Сурет: Egemen Qazaqstan
Президент Қасым-Жомарт Тоқаевтың Корея Республикасына мемлекеттік сапары екі ел арасындағы қарым-қатынасты жаңа деңгейге көтерді. Сапар барысында қазақстандық министрліктер, мемлекеттік органдар, жоғары оқу орындары мен ұйымдар кореялық әріптестерімен бірқатар келісім мен меморандумға қол қойды, деп хабарлайды Zhaiyqmedia.kz ақпарат агенттігі.
Сапар аясында шамамен 19 миллиард долларлық коммерциялық келісімдер жасалды. Сондай-ақ 16 қыркүйекте Сеулде алғашқы «Орталық Азия – Корея Республикасы» саммиті өтті. Онда білім, ғылым, технология, инвестиция және экономикалық ынтымақтастық мәселелері талқыланды.
Сапар барысында Л.Н. Гумилев атындағы Еуразия ұлттық университеті мен Кореяның инженерлік білім беруді аккредиттеу кеңесі (ABEEK) арасында өзара түсіністік туралы меморандумға қол қойылды. Құжатқа ЕҰУ Басқарма төрағасы – ректор, академик Ерлан Сыдықов пен ABEEK президенті У Сын Ким қол қойды.
Меморандум инженерлік және IT-білім беру саласындағы ынтымақтастықты дамытуға, білім беру бағдарламаларын халықаралық аккредиттеу тәжірибесін зерттеуге, мамандар арасында тәжірибе алмасуға және жоғары білім сапасын жетілдіруге бағытталған. Келісім тек студент алмасумен шектелмейді: тараптар білім беру бағдарламаларының мазмұнын жетілдіру, халықаралық талаптарды зерделеу, аккредиттеу тәжірибесін енгізу және білім сапасын бағалау тәсілдерін дамыту мәселелеріне де көңіл бөледі.
ЕҰУ-дың Кореямен байланысы бұған дейін де жалғасып келеді. Қазір университеттің Кореяның жоғары оқу орындары мен ғылыми ұйымдарымен ынтымақтастық жөніндегі 20 келісімі бар. Олардың аясында кореялық мамандар ЕҰУ студенттері мен докторанттарының ғылыми жұмыстарына қатысып келеді. Чонбук ұлттық университеті, Андон ұлттық университеті, Пукён ұлттық университеті, Корея энергетикалық зерттеулер институты және Ханкук шетел тілдері университетінен алты консультант докторанттарға ғылыми жетекшілік және кеңес беру жұмыстарына тартылған.
Академиялық мобильдік те жалғасып келеді. 2022 жылдан бері ЕҰУ-дың 56 білім алушысы Кореяның жоғары оқу орындарында білім алған. Кореядан келген студенттер де ЕҰУ-да оқиды.
Сеулде өткен Қазақ-корей дөңгелек үстелі барысында ғылым, жоғары білім, жасанды интеллект және жоғары технологиялар салаларындағы ынтымақтастыққа қатысты бірқатар келісім рәсімделді. Бұл бағыттардың қатарында бірлескен зерттеулер, технологиялық жобалар, кадр даярлау және академиялық байланыстар бар.
