Сурет: aqorda_resmi
Мемлекет басшысы Қасым-Жомарт Тоқаев Германияға шақырғаны үшін Федералдық Президент Франк-Вальтер Штайнмайерге алғыс білдірді. Ол жоғары деңгейдегі қарқынды байланыстың екіжақты әріптестікке стратегиялық әрі жан-жақты сипат беріп отырғанын атап өтті, деп хабарлайды Zhaiyqmedia.kz ақпарат агенттігі.
Қасым-Жомарт Тоқаев Германияның Қазақстан үшін Еуропадағы басты серіктес екеніне тоқталды. Екі елді берік достық пен өзара сенім жалғастырады. Сонымен қатар ынтымақтастықты өрістетуге мол әлеует бар.
– Бүгінде ауқымды бағытты қамтыған қарым-қатынасымыз сенімді түрде дамып келеді. Оған үкіметтеріміз бен екі ел іскерлік топтарының дәйекті байланысымен беки түскен жоғары деңгейдегі белсенді саяси диалог айтарлықтай ықпал етіп отыр. Сапарымның қарсаңында Берлинде Үкіметаралық жұмыс тобының отырысы мен Стратегиялық ынтымақтастық жөніндегі Қазақстан-Германия іскерлік кеңесінің өтуі қос тараптың өзара тиімді серіктестікті жандандыруға ынталы екенін көрсетті, – деді Қасым-Жомарт Тоқаев.
Мемлекет басшысы сауда-экономикалық және инвестициялық байланыстың қарқынды дамып келе жатқанына назар аударды.
– 2025 жылы екіжақты тауар айналымы 4,5 миллиард долларға жетті. Биыл да оң қарқын сақталып отыр. Жыл басынан бергі 7 айда өзара сауданың көлемі 2,6 миллиард доллардан асты. Қазақстанда неміс капиталы бар 1400-ден астам компания тіркелген. Жиырма жыл ішінде Германиядан тартылған инвестицияның жалпы көлемі 8 миллиард долларды құрады. Германияның CLAAS Group, Rhenus Logistics, Siemens Energy, Linde секілді жетекші компанияларымен байланыс – ықпалдастығымыздың жарқын үлгісі, – деді Қазақстан Президенті.
Келіссөз барысында екі елдің мәдени-гуманитарлық ынтымақтастығын нығайту мәселесіне айрықша мән берілді.
Атап айтқанда, мемлекеттер басшылары білім, медицина және мәдениет салаларындағы ықпалдастықты одан әрі жандандыруға бейіл екенін растады.
