Үкімет отырысында Энергетика вице-министрі Сұңғат Есімханов алдағы жылыту маусымына дайындық барысы мен инфрақұрылымды жаңғырту жоспарын таныстырды. 2023-2029 жылдарға арналған кешенді жоспар аясында энергетика және коммуналдық секторларды жаңғыртуға 2,7 триллион теңге қарастырылған, деп хабарлайды Zhaiyqmedia.kz ақпарат агенттігі.
Вице-министрдің айтуынша, қазіргі уақытта жылу электр станцияларының 67 пайызы тозған, ал желілердің тозу деңгейі 70 пайызға жеткен. Осыған байланысты 2024 жылы 17 жылу электр орталығын жаңғырту жоспарланған.
«Біздің басты міндетіміз – халықты үздіксіз жылумен қамтамасыз ету. Ол үшін барлық қажетті қаржы қарастырылған», – деді Сұңғат Есімханов.
Сондай-ақ, коммуналдық инфрақұрылымды жаңғыртуға 1,2 триллион теңге бөлініп, сумен жабдықтау және кәріз жүйелерін жаңарту көзделген. Жобалардың тиімділігін арттыру үшін мемлекеттік-жекешелік әріптестік механизмі кеңінен қолданылады.
Алдағы жылыту маусымына дайындық аясында жөндеу жұмыстары 15 қыркүйекке дейін аяқталуы тиіс. Өңірлердегі әкімдіктерге дайындықты жеделдету тапсырылды.
