Мазмұнға өту
Бүгін «Таза Қазақстан» республикалық экологиялық акциясы аясында телекөпір өтті. Оған Президент Қасым-Жомарт Тоқаев қатысып, акцияның алғашқы қорытындыларын жариялады, деп хабарлайды Zhaiyqmedia.kz ақпарат агенттігі.
Телекөпір барысында еліміздің түкпір-түкпірінен тазалық шараларына қатысқан белсенділер мен еріктілер есеп берді. Шымкент басты алаңға айналды – мұнда мыңдаған адам көшелерді, саябақтарды және өзен жағалауларын қоқыстан тазартты.
Президент акцияны жоғары бағалап, экологиялық мәдениетті қалыптастыру маңызды екенін атап өтті.
«Тазалық – әрқайсымыздың күнделікті парызымыз. Мемлекет қолдау көрсетеді, бірақ бастысы – халықтың белсенділігі», – деді Қасым-Жомарт Тоқаев.
Акция аясында еліміз бойынша 500 мыңнан астам адам қатысып, 10 мың тонна қоқыс шығарылды. Енді «Таза Қазақстан» жобасы жүйелі түрде жалғасып, әр айдың соңғы сенбісінде жалпыұлттық сенбіліктер өткізілмек.
