Президент Қасым-Жомарт Тоқаев «Таза Қазақстан» экоакциясы аясында сөйлеген сөзінде қаңғыбас иттер мәселесін көтерді. Ол елде иттердің шабуылынан зардап шеккендердің саны өсіп келе жатқанын айтты.
«Балалар мен ересектер жиі құрбан болып жатыр. Бұл – жедел шешуді қажет ететін өткір мәселе», – деді Президент.
Тоқаев жергілікті атқарушы органдарға қаңғыбас жануарлардың санын азайту үшін нақты шаралар қабылдауды тапсырды. Ол бұл жұмыстың жүйелі жүргізілуі керектігін ескертті.
Айта кетейік, бұған дейін де қаңғыбас иттердің адамдарға шабуыл жасауы жиілеген. Әсіресе балалар мен әйелдер қауіп-қатерге көбірек ұшырап жүр. Президенттің бұл мәселені көтеруі – халықтың алаңдаушылығын ескергендігінің белгісі, деп хабарлайды Zhaiyqmedia.kz ақпарат агенттігі.
