Қазақстанның төрт өңірінде Конго-Қырым геморрагиялық қызбасының (КҚГҚ) таралу қаупі әлі де жоғары. Бұл – аса қауіпті вирус, жұқтырған адамның өліміне әкелуі мүмкін, деп хабарлайды Zhaiyqmedia.kz ақпарат агенттігі.
Мамандардың айтуынша, қауіпті аймақтарға Маңғыстау, Қызылорда, Түркістан облыстары мен Шымкент қаласы кіреді. Дәл осы өңірлерде кенелер белсенді түрде таралып, вирусты жұқтыру ықтималдығы жоғары.
«Конго-Қырым қызбасы – табиғи ошақты инфекция. Оны жұқтырған адамның дене қызуы көтеріліп, қан кетулер басталады. Егер дер кезінде медициналық көмек көрсетілмесе, өлімге әкелуі мүмкін», – дейді дәрігерлер.
Вирус негізінен кене шаққанда жұғады. Сондықтан далада, мал шаруашылығымен айналысатын адамдарға сақ болу керек. Мамандар қорғаныш киім киюді, кенелерге қарсы дәрі қолдануды ұсынады.
Биыл Қазақстанда КҚГҚ жұқтырғандар саны 10 адамға жеткен. Оның ішінде бір жағдай өліммен аяқталған. Денсаулық сақтау министрлігі эпидемиологиялық жағдайды бақылап, алдын алу шараларын күшейтті.
