Сурет: РБК
SpaceX акцияларының бастапқы орналастырылуы (IPO) компанияның қазіргі және бұрынғы мыңдаған қызметкеріне үлкен байлық әкеледі, деп хабарлайды Zhaiyqmedia.kz ақпарат агенттігі.
The New York Times-тың жазуынша, IPO-дан кейін 4,4 мыңнан астам адам миллионер атануы мүмкін, ал 400-ге жуық қызметкердің активтері 100 миллион доллардан асады. Бұл деректер Hill.com инвестициялық платформасының талдауына негізделген.
Платформаның негізін қалаушы әрі бас директоры Эндрю Бенсоннің айтуынша, мұндай жағдай қор нарығында сирек кездеседі. Ол әдетте IPO-дан кейін негізін қалаушылар ғана миллиардер болатынын, ал жүздеген қызметкердің 100 миллион доллардан астам байлыққа ие болуы ерекше екенін атап өтті.
SpaceX-тің бұрынғы инженері Гэвин Пети де пайда көргендердің бірі. Ол 2012 жылы жылына 80 мың доллар жалақымен жұмысқа орналасып, әрқайсысы 13,8 доллар тұратын бірнеше мың акция алған. Кейін ол сыйақыны акция түрінде алып, пакетінің басым бөлігін сақтап қалған. Қазір оның 50 мыңнан астам акциясы бар, бұл оны мультимиллионерге айналдырды.
Бұрынғы қызметкердің айтуынша, SpaceX IPO-сы технологиялық дәуірдегі ең табысты IPO-лармен салыстыруға келеді. Алайда кейбір қызметкерлер акцияларын IPO-ға дейін сатып жіберген, тіпті оларды мейрамхана сыйлық сертификаттарына айырбастағандар да болған.
Еске сала кетейік, SpaceX IPO-сы Илон Масктің байлығын 1 триллион доллардан асырып, оны тарихтағы ең бай адамға айналдырды. Компания акцияларды бір акция үшін 135 доллардан орналастырды.
