Сурет: Ашық дереккөз
Премьер-министр Олжас Бектенов су айдындары, жағажайлар мен бассейндерді 1 маусымға дейін тексеруді тапсырды, деп хабарлайды Zhaiyqmedia.kz ақпарат агенттігі.
Үкімет отырысында Бектенов Төтенше жағдайлар министрлігіне әкімдіктермен бірлесіп, барлық су нысандарын қауіпсіздік талаптарына сай тексеруді міндеттеді. Бұл шара жазғы маусымға дайындық аясында қабылданды.
Премьер-министр қауіпсіздік ережелерін бұзған жағажайлар мен бассейндердің жұмысын тоқтатуды талап етті. «Егер су айдындары қауіпсіздік шарттарына жауап бермесе, оларды пайдалануға рұқсат берілмейді», — деді Бектенов.
Тексеру барысында құтқару қызметтерінің дайындығы, жағажайлардың жабдықталуы және су сапасы тексеріледі. Әкімдіктерге азаматтарды судағы қауіпсіздік ережелерімен таныстыру жұмыстарын жүргізу де тапсырылды.
