Мазмұнға өту
Сурет: Жайық Пресс
Оралда ҚР ІІМ Ұлттық ұланы 5517 әскери бөлімінің әскери қызметшілері жоғалған iPhone 16 смартфонын иесіне қайтаруға көмектесті, деп хабарлайды Zhaiyqmedia.kz ақпарат агенттігі.
Оқиға кешкі уақытта Т. Масин көшесінде болды. Қоғамдық тәртіпті қорғау кезінде әскери жасақ бастығы Бауыржан Генжебаев жол жиегіндегі аллея маңында жатқан ұялы телефонды байқады. Әскери қызметшілер табылған смартфонды көтеріп алып, көп ұзамай оған қоңырау түсті. Ұландықтар қоңырау шалушыға телефонның табылғанын хабарлап, оны тапсыру үшін кездесу орнын келісті.
Смартфон иесінің айтуынша, ол телефонды жоғалтқаннан кейін оны қайда қалдырғанын есіне түсіре алмаған. Құрылғыны табуға үміттеніп, ол танысының телефонынан өз нөміріне бірнеше рет қоңырау шалған, бірақ ұзақ уақыт бойы ешкім жауап бермеген. Шамамен бір жарым сағаттан кейін қоңырауға Ұлттық ұланның әскери қызметшілері жауап берді.
«Мен телефонды қалада жоғалтып алдым және оның қайда қалғанын болжай алмадым. Танысымның телефонынан өз нөміріме үнемі қоңырау шалдым, бірақ ұзақ уақыт ешкім жауап бермеді. Біраз уақыттан кейін қоңырауға Ұлттық ұланның әскери қызметшілері жауап беріп, өз орналасқан жерлерін хабарлап, телефонды бірден маған тапсырды. Ұландықтарға адалдығы, сергектігі және жеделдігі үшін шын жүректен алғыс білдіремін», – деді смартфон иесі.
Ұлттық ұлан әскери қызметшілерінің мұқияттылығы мен адалдығының арқасында жоғалған смартфон қысқа мерзімде иесіне қайтарылды. Мұндай әрекеттер әскери қызметшілердің жауапкершілігінің, адалдығының және қызметтік міндеттеріне адал қарауының үлгісі болып табылады.
