Сурет: Жайық Пресс
Д. Нұрпейісова атындағы музыка мектебінде «Дина» және «Мұхит» сыныптарының салтанатты ашылуы өтті. Бұл шара күйші-домбырашы Дина Нұрпейісованың 165 жылдығына және композитор Мұхит Мералиұлының 185 жылдығына арналды, деп хабарлайды Zhaiyqmedia.kz ақпарат агенттігі.
Облыстық қоғамдық даму басқармасы басшысының орынбасары Гүлжанар Шүкеева іс-шараның Республика күні қарсаңында Жайық өңірінің қасиетті жерінде өтіп жатқанын атап өтті. Оның айтуынша, музыка мектебі жас таланттарды тәрбиелейтін маңызды орталық болып табылады, ал жаңа сыныптардың ашылуы ұжымның үлкен еңбегінің нәтижесі. Биыл ғимаратта жүргізілген күрделі жөндеу де қуаныш тудырады.
Музыка мектебінің директоры Мұхамбетқали Далбаев сыныптардың ашылуы оқу орны үшін маңызды оқиға екенін айтты.
– Дина Нұрпейісова мен Мұхит Мералиұлы ұлттық музыка өнерін дамытуға баға жетпес үлес қосты. Сыныптардың ашылуы – атақты тұлғалардың рухына құрмет көрсету ғана емес, сонымен қатар жастар арасында ұлттық өнерді насихаттауға, мәдени мұраға баулу арқылы өскелең ұрпақтың бойында патриотизмді тәрбиелеуге мүмкіндік, – деді мектеп басшысы.
Оның сөзінше, ұжым үшін ерекше мақтаныш – оқу орнының Дина Нұрпейісованың есімін иеленуі. Бұл тек үлкен құрмет қана емес, сонымен қатар музыкалық дәстүрлерді сақтау мен жалғастыру үшін үлкен жауапкершілік.
Бүгінде мектеп оқушылары домбыра, фортепиано, хореография, театр өнері және басқа да пәндерді меңгеруде. Жас таланттар оқу орнын конкурстарда табысты таныстырып, жастардың шығармашылыққа және ұлттық мәдениетке қызығушылығын дәлелдеп келеді.
Жаңа сыныптар Жайық өңірінің музыкалық мұрасын сақтауға және атақты шеберлердің дәстүрін жалғастыратын болашақ орындаушылар ұрпағын тәрбиелеуге тағы бір қадам болмақ.
