БҚО-да қайтарылған активтерге әлеуметтік нысандар салуға 17,7 млрд теңге жұмсалды

Сурет: Жайық Пресс

Батыс Қазақстан облысында мемлекетке қайтарылған активтер есебінен әлеуметтік инфрақұрылым нысандарын салуға 17,7 млрд теңге бағытталды, деп хабарлайды Zhaiyqmedia.kz ақпарат агенттігі.

Бұл есептегі дерексіз сан емес, ауыл тұрғындарының күнделікті өмірін өзгертіп жатқан ауруханалар, фельдшерлік-акушерлік пункттер (ФАП) және су құбырлары. Бүгінде осы қаражатқа жалпы құны 4,9 млрд теңге болатын 23 нысан салынды, тағы 4 жоба жүзеге асырылуда.

Аяқталған нысандардың бірі – Сырым ауданындағы Шағырлой ауылындағы жаңа ФАП. Мұнда тұрғындар 1979 жылы салынған, қазіргі заманғы талаптарға сай емес ғимаратта емделген. Бұрын ауыл тұрғындары аудан орталығына дейін 22 шақырым жол жүруге мәжбүр болған. Қазір сапалы медициналық көмек қолжетімді, оны ауылдың 623-тен астам тұрғыны пайдаланып жатыр.

Жоба құны 337,8 млн теңгені құрады, оның 136 млн теңгесі мемлекетке қайтарылған активтерден құрылған СГФ-тан бөлінді. Бұл – бұрын заңсыз айналымнан шығарылған, енді халық игілігіне жұмсалып жатқан қаражат. Жергілікті тұрғындар медпункттің ашылуын көптен күткен оқиға деп санайды, өйткені ол ауылдағы медициналық көмектің қолжетімділігі мәселесін шешті.

Қаражаттың мақсатты жұмсалуын және құрылыс барысын прокуратура органдары қадағалайды, қайтарылған активтер тұрақты бақылауда. Шағырлой тарихы – мемлекетке қайтарылған активтердің азаматтардың өмір сапасына айналуының айқын мысалы.