Сурет: Egemen Qazaqstan
Футболдан Ресей мен Катарда өткен соңғы екі әлем чемпионаты халықтарды біріктіретін күш екенін дәлелдеді. Алайда 2026 жылғы әлем чемпионатына дайындық кезінде АҚШ-тағы визалық шектеулер мен қауіпсіздік тексерістері халықаралық футбол қауымдастығында алаңдаушылық тудыруда, деп хабарлайды Zhaiyqmedia.kz ақпарат агенттігі.
Соңғы айларда бірқатар елдердің футболшылары, төрешілері мен делегация мүшелері АҚШ-қа кіру кезінде кедергілерге тап болғаны туралы ақпарат таралуда. Бұл жағдай спортты саясиландыру туралы пікірталас тудырды.
Өзбекстан құрамасы Нидерландқа қарсы ойын алдында полицияның арнайы тексеруінен өтті, тексеру кезінде қызметтік иттер пайдаланылды. Ирак құрамасының көшбасшысы Айман Хусейн АҚШ әуежайында шамамен жеті сағат бойы «күдікті» ретінде жауап берді, ал команда фотографы он сағаттық тексеруден кейін елден кетуге мәжбүр болды.
Сомалилік төреші Омар Артан дипломатиялық төлқұжатына қарамастан АҚШ-қа кіре алмады. Иран құрамасының 15 қызметкеріне америкалық виза берілмеді, сондықтан команда дайындық базасын Мексикада орналастыруға мәжбүр болды. Тіпті топтық кезеңдегі барлық ойындарын АҚШ-та өткізсе де, әр кездесуден кейін елден шығып, қайта кіру тәртібін сақтауға тура келеді.
Сенегал құрамасы ұшақтан түспей тұрып, ұшу-қону жолағында тексеруден өткені хабарланды.
Сарапшылардың пікірінше, қауіпсіздік талаптарын күшейту заңды болғанымен, мұндай жағдайлар әлем чемпионатының негізгі құндылықтарына көлеңке түсіруі мүмкін. Футболдың басты миссиясы – ұлттар мен мәдениеттерді жақындастыру, ал қатысушылардың төлқұжатына немесе шыққан еліне байланысты шектеулер турнирдің ашықтығына күмән туғызады.
2026 жылғы әлем чемпионаты әлі басталған жоқ, сондықтан оны «тарихтағы ең нашар» деп айту ерте. Дегенмен визалық және шекаралық мәселелер ұйымдастырушылар үшін маңызды сын-қатерге айналып отыр. Егер бұл жағдайлар жалғаса берсе, жанкүйерлер мен қатысушылардың көңіл-күйіне әсер етуі мүмкін.
Айта кетейік, әлем чемпионаты 11 маусым мен 19 шілде аралығында АҚШ, Канада және Мексикада өтеді.
