Қазақстанның 8 облысында өрт қаупі жоғары және төтенше деңгейге жетті. Синоптиктер дауылды ескерту жариялап, халықты сақ болуға шақырып отыр, деп хабарлайды Zhaiyqmedia.kz ақпарат агенттігі.
«Қазгидромет» мәліметінше, 28 маусымда еліміздің басым бөлігінде күннің ашық әрі ыстық болуы күтіледі. Тек солтүстік өңірлерде ғана жаңбыр жауып, найзағай ойнайды.
«Атырау, Ақтөбе, Қостанай, Маңғыстау, Батыс Қазақстан, Қызылорда, Түркістан облыстары мен Жетісу аймағында өрт қаупі төтенше сақталады», — делінген ресми хабарламада.
Мамандар бұл күндері орманды алқаптарда, далалы жерлерде от жағуға, қоқыс түтетуге қатаң тыйым салынатынын ескертеді. Тіпті, шыны қалдықтары да өртке себеп болуы мүмкін.
Батыс Қазақстан облысында жағдай ерекше бақылауда. Өңірдегі орман шаруашылығы қызметкерлері күшейтілген режимде жұмыс істеп жатыр. Ауа температурасы +35 градустан асып, өрттің тарау қаупін арттырып отыр.
