Еңбек және халықты әлеуметтік қорғау министрі Асқарбек Ерсаев Қазақстанда БЖЗҚ-дан зейнетақы жинақтарын алу үшін жеткіліктілік шегін арттыруды жоспарлап отыр, деп хабарлайды Zhaiyqmedia.kz ақпарат агенттігі.
Бұл дегеніміз – зейнетақы қорынан ақша шешіп алу бұрынғыдан да қиындайды. Министрлік бұл шараны зейнетақы жүйесінің тұрақтылығын қамтамасыз ету үшін қажет деп түсіндіреді.
«Біз жеткіліктілік шегін қайта қарастырып жатырмыз. Бұл зейнетақы жинақтарының ұзақ мерзімді сақталуына ықпал етеді», – деді министр.
Қазіргі таңда БЖЗҚ-дан жинақты алу үшін белгілі бір шекті мөлшерден асып кету керек. Жаңа өзгерістерден кейін бұл шек одан әрі көтеріледі. Нақты сандар әлі жарияланған жоқ.
Сарапшылардың пікірінше, мұндай шешім халықтың зейнетақы жинақтарын мерзімінен бұрын алуына тосқауыл қойып, кейінгі жылдары зейнетақы төлемдерінің тұрақты болуына көмектеседі.
