Сурет: aqorda_resmi
Мемлекет басшысы Қасым-Жомарт Тоқаев Ұлттық қауіпсіздік комитетінің төрағасы Ермек Сағымбаевты қабылдады, деп хабарлайды Zhaiyqmedia.kz ақпарат агенттігі.
Кездесуде ведомствоның жыл басынан бергі қызметінің негізгі қорытындылары баяндалып, алдағы кезеңге арналған жоспары таныстырылды.
Президентке терроризммен, экстремизммен, есірткі бизнесімен және ұйымдасқан қылмыспен күрес аясындағы шаралар туралы есеп берілді. Сыбайлас жемқорлыққа қарсы іс-қимыл, кибер және ақпараттық қауіпсіздік мәселелеріне ерекше назар аударылды.
Кездесу соңында Мемлекет басшысы ұлттық қауіпсіздік органы қызметінің бағыттары бойынша бірқатар тапсырма берді.
Бұған дейін Мемлекет басшысы Қауіпсіздік Кеңесінің шұғыл отырысын өткізген болатын. Онда сыбайлас жемқорлыққа батқан ниеті теріс кісілер – біздің қас жауымыз екені, олардың «Халықтық құрылыс» бағдарламасын іске асыруға зиян тигізуді ойлап жүргені жеткізілді.
Президент Үкімет пен бақылаушы органдарға жемқорлықты азайту жөнінде ұсыныс әзірлеуге уақыт берді және жемқорлыққа қарсы шаралардың бәрі халыққа ашық көрсетілетіні айтылды.
Сондай-ақ Мемлекет басшысы Конституцияның негізгі ережелерін сақтамағандар қатаң жазаланатынын мәлімдеді.
