Сурет: ҚТЖ
«Қазақстан темір жолы» ұлттық компаниясы» АҚ басқарма төрағасы Талғат Алдыбергенов қызметінен босатылды, деп хабарлайды Zhaiyqmedia.kz ақпарат агенттігі.
Ұлттық компанияның мәліметінше, оның өкілеттігі акционер – «Самұрық-Қазына» АҚ-ның шешімімен мерзімінен бұрын тоқтатылды.
«Акционердің шешімімен «ҚТЖ» ҰК» АҚ басқарма төрағасы Алдыбергенов Талғат Сағиұлының өкілеттігі мерзімінен бұрын тоқтатылды», делінген ресми хабарламада.
Ұлттық теміржол компаниясының жаңа басшысы болып кім тағайындалатыны әзірге белгісіз. Талғат Алдыбергенов бұл қызметке 2025 жылдың шілде айында тағайындалған еді.
Ол еңбек жолын 1992 жылы бастап, әр жылдары Батыс Қазақстан темір жолында станса кезекшісі, коммерциялық бөлімнің басшысы және бөлімше бастығы болып жұмыс істеген. Кейін «Қазтеміртранс» және «Кедентранссервис» компанияларында басшылық лауазымдарды атқарған.
