2025 жылдың қаңтар айында қазақстандықтардың банк салымдары 1,1 трлн теңгеге азайды. Бұл – халықтың қалтасынан ақша кетіп жатқанын көрсететін маңызды сигнал, деп хабарлайды Zhaiyqmedia.kz ақпарат агенттігі.
Ұлттық банктің мәліметінше, жалпы салым көлемі 20,7 трлн теңгеге дейін төмендеген. Дегенмен жылдық есепте көрсеткіш 3,8 трлн теңгеге артқан. Яғни, ұзақ мерзімді динамика оң болғанымен, қысқа мерзімде халық ақшасын банктен алып қоя бастаған.
«Қаңтар айында салымдардың азаюы – әдеттегі құбылыс. Бірақ биылғы төмендеу көлемі айтарлықтай үлкен. Бұған инфляция мен тұтынушылық белсенділіктің артуы әсер еткен болуы мүмкін», – дейді экономист Нұрлан Серікқалиев.
Сарапшылардың пікірінше, халықтың банкке деген сенімі әлі де тұрақсыз. Алдағы айларда салымдардың қайта өсуі үшін пайыздық мөлшерлемелерді көтеру қажет болуы мүмкін.
