Сурет: gov.kz
Сыртқы істер министрі Ермек Көшербаев Сауд Арабиясының Өнеркәсіп және минералдық ресурстар министрі Бандар Әл-Хорайефпен кездесті, деп хабарлайды Zhaiyqmedia.kz ақпарат агенттігі.
Кездесуде тараптар сауда-экономикалық және инвестициялық ынтымақтастықтың өзекті мәселелерін талқылады. Өнеркәсіп секторындағы, әсіресе тау-кен металлургия кешені, аса маңызды минералдарды игеру және инфрақұрылымды дамыту бағыттарындағы өзара іс-қимылды кеңейтуге ерекше назар аударылды.
Е.Көшербаев Қазақстанның Сауд Арабиясымен стратегиялық серіктестікті дамытуға басымдық беретінін атап өтті. Ол биыл қол қойылған Қазақстан-Сауд Арабиясы Үйлестіру кеңесін құру, инвестицияларды өзара көтермелеу және қорғау туралы келісімдердің маңыздылығын айтты.
Тараптар тау-кен өнеркәсібі мен аса маңызды минералдар саласындағы бірлескен жобаларды іске асыруды және саудиялық компаниялардың Қазақстандағы инвестициялық бастамаларға қатысу мүмкіндіктерін талқылады.
Кездесуде су қауіпсіздігі мәселелері де қозғалып, халықаралық су ынтымақтастығын дамыту келешегі қарастырылды.
Б.Әл-Хорайеф екіжақты күн тәртібінің барлық бағыты бойынша практикалық өзара іс-қимылды одан әрі дамытуға мүдделі екенін білдірді.
Келіссөздер қорытындысы бойынша тараптар Қазақстан мен Сауд Арабиясы арасындағы өзара тиімді серіктестікті одан әрі нығайтуға дайын екенін растады.
