Сурет: ашық дереккөзден
Ташкент пен Баку Өзбекстан нарығына арналған автомобиль және авиациялық отынды бірлесіп өндіру, сондай-ақ мұнай мен мұнай өнімдерін ұзақ мерзімді жеткізу мәселесін талқылап жатыр. Бұған елдегі отынға деген ішкі сұраныстың артуы себеп болып отыр, деп хабарлайды Zhaiyqmedia.kz ақпарат агенттігі.
Өзбекстанның энергетика министрі Шерзод Ходжаевтың айтуынша, тараптар талқылап жатқан нұсқалардың бірі Өзбекстан мен Әзербайжандағы мұнай өңдеу кәсіпорындарында жанар-жағармай өндіруді көздейді. Оның сөзінше, Өзбекстан тарапы Әзербайжанға мұндай ынтымақтастықтың бірнеше нұсқасын ұсынған.
Өзбекстан Энергетика министрлігінің мәліметінше, екі ел мұнай мен мұнай өнімдерін ұзақ мерзімді жеткізуді, көмірсутек шикізатын бірлесіп өңдеуді, технология алмасуды және тұрақты логистикалық тізбектер құруды да қарастырып жатыр.
Қыркүйектің алғашқы онкүндігінде Шерзод Ходжаев бастаған Өзбекстан делегациясының Әзербайжанға сапары жоспарланған. Сапар барысында Әзербайжан Энергетика министрлігімен және мемлекеттік мұнай-газ компаниясы SOCAR өкілдерімен келіссөздер жүргізіледі деп күтілуде.
Кездесулер барысында Әзербайжан президенті Ильхам Әлиевтің Ташкентке жақында жасаған сапары кезінде және Өзбекстан президенті Шавкат Мирзиёевпен кездесулерде қол жеткізілген уағдаластықтарды іске асыру мәселелері талқыланады.
Өзбекстан мұнай өнімдерінің импортына едәуір тәуелді. Елге жанар-жағармай жеткізетін негізгі мемлекеттердің бірі Ресей. Алайда қазір Ресейдің өзінде мұнай өңдеу зауыттарына жасалған украиналық дрон шабуылдарына байланысты отын тапшылығы байқалып отыр.
Мәскеу жанар-жағармай экспортын шектегеннен кейін Ресейден келетін жеткізілімдерге сүйеніп отырған Өзбекстан және Орталық Азияның басқа да елдері отынның балама көздерін белсендірек іздей бастады.
Бұған дейін Өзбекстанға Грузия мен Ирактан авиациялық керосин жеткізу жолға қойылғаны хабарланған болатын. Сонымен қатар «Өзбекнефтегаз» компаниясы Қытай компанияларымен Jet A-1 авиациялық отынын ұзақ мерзімді жеткізу мәселесін талқылаған.
