Иеннің әлсіреуі жапондықтардың шетелге саяхатын азайтты

Сурет: Kyodo

Жапониядан шетелге шығатын туристер саны биылғы жазғы демалыста 8,8 пайызға азайып, 2,17 миллион адамды құрайды деп күтілуде. Бұл пандемиядан кейінгі алғашқы төмендеу, деп хабарлайды Kyodo, деп хабарлайды Zhaiyqmedia.kz ақпарат агенттігі.

JTB Corp. туристік агенттігінің мәліметінше, бұған иеннің әлсіреуі мен шығындардың артуы себеп болған. Компанияның 15 шілде мен 31 тамыз аралығына арналған болжамы бойынша, саяхат құнының қымбаттауы туристерді Солтүстік Америка мен Аустралия сияқты алыс бағыттардан бас тартуға мәжбүрлеп отыр. Инфляция жағдайында халықтың үнемдеуге көшуіне байланысты ішкі туризм де төмендеуі мүмкін.

Шетелге бір рет сапарлауға бір адам жұмсайтын орташа шығын 6,3 пайызға артып, 323 мың иенге (шамамен 2 мың доллар) жетеді деп болжанды. Шығындардың өсуіне иенаның әлсіреуінен бөлек, Таяу Шығыстағы дағдарыс салдарынан авиациялық отын бағасының қымбаттауы және отынға салынатын қосымша алымдардың өсуі де әсер етіп отыр.

Әуе билеті арзан жақын елдерге сұраныс жоғары. JTB бағалауынша, ең танымал бағыттардың көшін 26,2 пайызбен Оңтүстік Корея бастап тұр. Одан кейін 16,2 пайызбен Тайвань келеді. Премьер-министр Санаэ Такаичидің былтыр қарашада Тайваньға қатысты мәлімдемесінен кейін Токио мен Бейжің арасындағы қарым-қатынастың шиеленісуіне байланысты Қытайға сапарлар саны өткен жылғы көрсеткіштің жартысына дейін азайып, 10,1 пайызды құрайды деп күтілуде.

Жапония ішіндегі сапарлар саны өткен жылмен салыстырғанда 4,4 пайызға төмендеп, 69 миллионға жетеді деп болжанды. Бір адамның орташа шығыны 3,2 пайызға артып, 48 500 иенді құрайды. Токио кіретін Канто өңірі 19 пайызбен ең танымал бағыт болады деп күтілуде. Одан кейін Кинки өңірі – 14,9 пайыз және Хоккайдо – 11,2 пайыз.

Жалпы үрдіс тұрғындардың шығынға талғаммен қарай бастағанын көрсетеді. JTB өкілі: «Демалыс мерзімін қысқарту сияқты тәсілдермен шығынын азайтатындар мен қымбат болса да, қалаған сапарына барғысы келетіндер арасында айырмашылық артып келеді», – деді.

JTB бұл болжамды маусым айында жазғы демалыс кезеңінде кемінде бір түнге сапарға шығуды жоспарлаған адамдар арасында жүргізілген онлайн сауалнама негізінде жасаған.