Сурет: Үкімет
Қаржы министрлігі кәсіби бухгалтерлік ұйымдармен бірлесіп, 2026 жылдың 5 қаңтары мен 30 маусымы аралығында өткен «Халық бухгалтері» акциясының қорытындысын шығарды, деп хабарлайды Zhaiyqmedia.kz ақпарат агенттігі.
Акция кәсіпкерлерге практикалық қолдау көрсету, салық және бухгалтерлік есеп сапасын жақсарту, сондай-ақ 2026 жылы енгізілген салық заңнамасындағы өзгерістерді түсіндіруге бағытталды. Облыс орталықтары мен Астана, Алматы, Шымкент қалаларындағы Мемлекеттік кірістер департаменті бөлімшелерінде тегін жеке кеңестер ұйымдастырылды. Кеңестерді кәсіби бухгалтерлер мен мемлекеттік кірістер қызметкерлері жүргізді. Акцияға 120-дан астам аккредиттелген кәсіби бухгалтер қатысып, алты ай ішінде бұл бастама бизнес пен мемлекет арасындағы ашық диалог алаңына айналды.
— Тәжірибе көрсеткендей, кәсіпкерлер арасында тікелей өзара әрекеттесу форматына сұраныс айтарлықтай жоғары. Қатысушылар жаңа Салық кодексін қолдану, оңтайлы салық режимін таңдау, өтпелі кезеңнің ерекшеліктері, салық жеңілдіктері мен шегерімдері, ҚҚС бойынша тіркеу және есептен шығару, арнаулы салық режимдерін қолдану, электронды шот-фактураларды рәсімдеу, ақпараттық жүйелерді пайдалану, өзін-өзі жұмыспен қамтыған жеке тұлғаларды есепке алу және олардың қызметіне қатысты мәселелер бойынша сараптамалық түсініктемелер алды, — делінген хабарламада.
Акцияның маңызды ерекшелігі — кәсіпкерлердің тәжірибелі бухгалтерлер мен мемлекеттік кірістер қызметкерлерінен жеке кеңес алу мүмкіндігі, бұл нақты жағдайлардың шешімін табуға және салық міндеттемелерін орындаудағы қателерді болдырмауға көмектесті. «Халық бухгалтері» салық сауаттылығын арттыруға, ерікті салық төлеу мәдениетін қалыптастыруға және қолайлы бизнес орта құруға бағытталған тиімді ынтымақтастық үлгісіне айналды. Тегін кәсіби көмек мыңдаған кәсіпкерге заңнамалық өзгерістерге бейімделуге және өзекті сұрақтарына жауап алуға мүмкіндік берді.
Бұл тәжірибе жалғасып, жергілікті мемлекеттік кірістер базасында ай сайын бухгалтерлік ұйымдармен бірлесіп салық заңнамасын түсіндіру бойынша «Ашық есік күндері» өткізілетін болады.
