Астанада экспорт несиелері мен инвестицияларды сақтандырушылардың ең ірі халықаралық бірлестігі – Берн одағының көктемгі отырысы басталды. Бұл – Орталық Азияда алғаш рет өтіп жатқан дүниежүзілік деңгейдегі қаржы жиыны.
Жиынға әлемнің 40-тан астам елінен 200-ге жуық делегат қатысып жатыр. Олардың арасында ірі сақтандыру компанияларының басшылары, экспорттық агенттіктердің өкілдері және халықаралық қаржы ұйымдарының сарапшылары бар.
«Біз үшін бұл – үлкен мәртебе. Қазақстан Орталық Азиядағы қаржы хабына айналып келеді. Берн одағының отырысын өткізу – соның айқын дәлелі», – деді Қазақстанның экспорттық сақтандыру компаниясының бас директоры.
Отырыс барысында экспорттық несиелеу мен инвестициялық сақтандырудың жаңа тетіктері, климаттық өзгерістерге бейімделу және цифрлық трансформация мәселелері талқылануда. Қазақстандық тарап өз тәжірибесімен бөлісіп, шетелдік әріптестерге инвестициялық ахуалды таныстырды.
Берн одағына әлемнің 80-нен астам елінің сақтандыру ұйымдары кіреді. Олардың үлесіне жаһандық экспорттық несиелердің 90 пайызы тиесілі. Астанадағы кездесу осы саладағы серіктестікті нығайтуға ықпал етпек, деп хабарлайды Zhaiyqmedia.kz ақпарат агенттігі.
