Мазмұнға өту
Сурет: Pexels
Экономикалық тұрақсыздық пен энергия бағасының өсуіне қарамастан, теңіз круиздері нарығы өсіп келеді, деп хабарлайды Zhaiyqmedia.kz ақпарат агенттігі.
2025 жылы круиздік саяхаттар саны 37 миллионнан асып, тарихи рекорд орнатты. Халықаралық круиздік компаниялар қауымдастығы сұраныстың арта түсетінін болжайды. Ұйымның бағалауынша, 2026 жылы жолаушылар саны 38 миллионнан асып, 2029 жылға қарай 42 миллионға жетеді.
Экономистер бұл үрдісті тұтынушылардың әдеттерінің өзгеруімен байланыстырады. Экономика баяулаған кезде де адамдар саяхат пен жаңа әсерлерден бас тартпай, автокөлік, жиһаз және басқа тауарларға жұмсалатын шығындарын қысқартады.
Круиз операторлары табысының көп бөлігін билет сатудан емес, кемедегі қосымша қызметтерден алады. Экскурсиялар, мейрамханалар, СПА, казинолар мен сусындар пайданың едәуір бөлігін құрайды.
Теңіз круиздерінің ең ірі нарығы — АҚШ. Былтыр америкалық туристер 20,6 миллион круиздік саяхат жасаған. Екінші орында Германия тұр. 2025 жылы немістер шамамен 3 миллион рет круизге шыққан, бұл алдыңғы жылмен салыстырғанда 10 пайызға жуық көп.
Саланың өсуімен жаңа сын-қатерлер де туындап отыр. Таяу Шығыстағы жағдайға байланысты компаниялар бағыттарын қайта қарастыруда. Экологиялық талаптардың күшеюі зияны аз кемелер жасауға және жаңа отын түрлерін пайдалануға инвестиция салуды талап етеді. Көптеген оператор пандемиядан кейін бизнестерін қалпына келтіруді жалғастыруда.
Осы факторларға қарамастан, сарапшылар алдағы жылдары теңіз круиздеріне сұраныс арта береді деп болжайды.
