Сурет: ашық дереккөз
2035 жылға қарай Қазақстанда 14 мамандық жойылып, 50 мыңға жуық адам жұмыссыз қалуы мүмкін. Бұл туралы Еуразиялық экономикалық форумда еңбек нарығына арналған сессияда айтылды, деп хабарлайды Zhaiyqmedia.kz ақпарат агенттігі.
Сарапшылардың болжамынша, ең алдымен кеңсе қызметкерлері, есепшілер, аудармашылар мен кассирлер жұмысынан айырылады. Олардың орнын жасанды интеллект басады. Қазақстанда қазірдің өзінде кейбір компаниялар роботтандыруды енгізіп жатыр.
Еңбек және халықты әлеуметтік қорғау министрлігінің өкілі Светлана Жақыпова бұл үдерістің алдын алу мүмкін емес екенін айтады.
«Технологиялық прогресті тоқтата алмаймыз. Бірақ адамдарды жаңа мамандықтарға қайта даярлау – біздің міндетіміз. Мемлекет бұған 10 миллиард теңге бөлді», – деді ол.
Министрлік 2025-2030 жылдарға арналған «Жұмыс» бағдарламасын әзірлеп жатыр. Бағдарлама аясында 100 мың адамды IT, жасанды интеллект және экология салаларына қайта даярлау жоспарланған. Әсіресе Батыс Қазақстан облысында мұнай-газ саласындағы автоматтандыруға байланысты жұмыс орындары қысқаруы мүмкін.
