Енді ұшақ салонында домбыраны алып жүруге заңды түрде рұқсат етілді. Көлік министрлігі әуе тасымалы қағидаларына өзгеріс енгізіп, ұлттық аспапты қол жүгі ретінде тасымалдауға жол ашты, деп хабарлайды Zhaiyqmedia.kz ақпарат агенттігі.
Бұрын домбыраны ұшаққа тек багаж ретінде өткізетін. Енді оны салонға алып кіруге болады. Министрліктің бұйрығымен «Жолаушыларды, багажды және жүктерді әуе көлігімен тасымалдау қағидаларына» тиісті түзетулер енгізілді.
Ведомство мәліметінше, жаңа ереже домбыраны қорғауға арналған арнайы қаптамада болса, салонға алып кіруге мүмкіндік береді. Сондай-ақ аспаптың көлемі қол жүгіне қойылатын талаптарға сай болуы керек.
«Бұл шешім ұлттық мәдениетті қолдау мақсатында қабылданды. Енді домбырашылар өз аспаптарын қасынан тастамай, әуе сапарларына шыға алады», — деді Көлік министрлігінің баспасөз қызметі.
Өзгерістердің нақты күшіне енетін күні әлі жарияланған жоқ. Министрлік алдағы уақытта толық түсіндірме жасайтынын айтты.
