Сурет: Egemen Qazaqstan
Мемлекет басшысы Қасым-Жомарт Тоқаев Қытайдың бұрынғы вице-президенті Чжао Лэцзиге І дәрежелі «Достық» орденін табыс етті. Бұл марапат – Қазақстан мен Қытай арасындағы стратегиялық серіктестікті нығайтуға қосқан үлесі үшін берілді, деп хабарлайды Zhaiyqmedia.kz ақпарат агенттігі.
Президент Тоқаев Қытайдың бұрынғы вице-президентін екі ел арасындағы достық пен ынтымақтастықты дамытудағы елеулі еңбегі үшін жоғары бағалады. Чжао Лэцзи Қазақстан мен Қытай арасындағы экономикалық және мәдени байланыстарды кеңейтуде маңызды рөл атқарған тұлға.
«Сіздің екіжақты қатынастарды дамытуға қосқан үлесіңіз зор. Біз бұл достықты жоғары бағалаймыз», – деді Қасым-Жомарт Тоқаев марапаттау рәсімінде.
Чжао Лэцзи, өз кезегінде, Қазақстанның тәуелсіздігін қолдап, екі ел арасындағы ынтымақтастықты одан әрі тереңдетуге дайын екенін жеткізді. Бұл марапат – екі мемлекет арасындағы сенім мен өзара құрметтің айқын көрінісі.
