Сурет: әлеуметтік желіден
Алматылық «Қайрат» Конференция лигасының жалпы кезеңіндегі үшінші турда Италияның «Аталанта» командасымен 1:1 есебімен тең түсті, деп хабарлайды Zhaiyqmedia.kz ақпарат агенттігі.
Кездесу 5 қарашадан 6 қарашаға қараған түні Бергамодағы «Нью Бэланс Арена» стадионында өтті. Бірінші таймда алаң иелері допқа көбірек иелік етті: «Аталанта» — 63%, «Қайрат» — 37%. Алайда екі команда да қарсылас қақпасына алты реттен соққы жасағанымен, алғашқы тайм голсыз аяқталды.
Екінші таймның 53-минутында алматылықтар есеп ашты: шабуылшы Марк Гуаль «Аталанта» қақпашысын қапы қалдырды. 81-минутта бұрыштама добынан кейін Никола допты бос қақпаға бағыттап, есепті теңестірді — 1:1.
«Қайрат» жалпы кезеңде тағы үш ойын өткізеді: 26 қарашада өз алаңында швециялық «Мьельбюді», 10 желтоқсанда румыниялық «Университатя Крайованы» қабылдайды, ал 18 желтоқсанда сырт алаңда нидерландтық «Твентемен» кездеседі.
Конференция лигасының жалпы кезеңінде әр клуб алты матч ойнайды (үшеуі өз алаңында, үшеуі сыртта). Үздік сегіздікке енген командалар тікелей 1/8 финалға шықса, 9–24-орындардағы клубтар плей-офф кезеңінде бақ сынайды.
Еске салайық, «Қайрат» алғашқы турда латвиялық «Ригамен» тең түссе, екінші кездесуде грекиялық «Панатинаикосқа» ірі есеппен жол берген еді.
