Сурет: Видеодан алынған кадр
Оралда автобустың артына жабысып, қауіпті әрекет жасаған үш оқушының ата-анасы әкімшілік жауапкершілікке тартылды. Олардың әрқайсысы 10 АЕК (43 250 теңге) мөлшерінде айыппұл төледі, деп хабарлайды Zhaiyqmedia.kz ақпарат агенттігі.
Батыс Қазақстан облыстық полиция департаментінің мәліметінше, оқиға 3 қараша күні сағат 18:30 шамасында Абай даңғылында болған. 8–9-сынып оқушылары №22 бағыттағы автобустың артқы жағына жасырын жабысып алған.
Әлеуметтік желіде тараған суреттерден кейін полиция тексеру жүргізіп, мектеп инспекторы жасөспірімдердің жеке басын анықтады.
«Оқушылар мен ата-аналары мектеп әкімшілігінің қатысуымен әңгімеге шақырылып, балаларға мұндай әрекеттің қауіпті екені түсіндірілді. Полиция ата-аналарды кәмелетке толмаған баланы тәрбиелеу жөніндегі міндеттерін орындамағаны үшін Әкімшілік құқық бұзушылық туралы кодекстің 127-бабы бойынша жауапқа тартты», делінген полиция хабарламасында.
Еске салайық, бұған дейін Астанада қабырғаға сурет салған жасөспірімдердің ата-анасы жауапқа тартылған болатын.
