Сурет: istockphoto.com
Енді мобильді аударымдарға қатысты тексеру хабарламасын алған азаматтар 30 жұмыс күні ішінде түсініктеме беруі немесе декларация тапсыруы керек, деп хабарлайды Zhaiyqmedia.kz ақпарат агенттігі.
Бұл талап Қазақстандағы мобильді аударымдарды бақылау шаралары аясында енгізілді. Салық органдары күдікті транзакциялар бойынша хабарлама жіберген жағдайда, алушы белгіленген мерзімде жауап беруге міндетті.
Егер азамат хабарламаны елемесе немесе мерзімін өткізіп алса, оған қосымша тексеру жүргізілуі мүмкін. Сарапшылардың айтуынша, бұл шара көлеңкелі экономиканы азайтуға және салық төлемдерін арттыруға бағытталған.
«Хабарлама алған кезде дереу шара қолдану қажет. 30 күн – бұл декларация дайындауға жеткілікті уақыт», – дейді салық консультанты Айгүл Серікқалиева.
Мобильді аударымдарды бақылау 2023 жылдан бастап күшейтілген болатын. Енді үлкен сомаларды жиі аударатын азаматтар салық органдарының назарында болуы тиіс.
