Сурет: Bild
Дональд Трамптың Ақ үйге қайта оралуына дейінгі 20 күнді баяндайтын «Мелания» деректі фильмі кассалық табыс жағынан сәтсіз болса да, АҚШ-тың бірінші ханымы Мелания Трампқа миллиондаған доллар табыс әкелді, деп хабарлайды Zhaiyqmedia.kz ақпарат агенттігі.
АҚШ президентінің жарияланған қаржылық декларациясына сәйкес, Мелания Трамп фильмге берілген лицензиялық құқықтардан 10,71 миллион доллар табыс тапқан. Бұл деректі фильмді Amazon компаниясы түсірген. Туынды ерлі-зайыпты Трамптардың қаржылық құжаттарында көрсетілген бірінші ханымның ең ірі табыс көзі болып отыр.
Құжаттарға сәйкес, оған «Мелания» атты естелік кітабынан 521 161 доллар, ал NFT мен басқа да коллекциялық заттарды сатудан 6 миллион доллардан астам кіріс түскен.
Фильмнің тұсаукесеріне дейін The Wall Street Journal басылымы Мелания Трамптың фильмнің құқықтарын сатқаны үшін 28 миллион доллар алғанын хабарлаған еді. Алайда деректі фильм әлемдік прокаттан небәрі 14,6 миллион еуро жинады, ал жобаға салынған инвестиция көлемі – 65,5 миллион еуро. Оның ішінде 35 миллион еуродан астамы фильмнің құқықтарын сатып алу мен өндіріс шығындарына, тағы 31 миллион еуро маркетингке жұмсалған. Премьерадан кейінгі алғашқы демалыс күндері фильм АҚШ-тағы 1778 кинотеатрда бар болғаны 7,04 миллион доллар табыс әкелді.
Жобаның шығынын ішінара өтеу үшін Amazon енді фильмді Prime Video стримингтік сервисінде көрсету арқылы қосымша табыс табуға үміт артып отыр.
