Сурет: Жайық Пресс
Жаңа оқу жылы қарсаңында ҚР Ұлттық ұланының «Батыс» өңірлік қолбасшылығында дәстүрлі «Мектепке жол» қайырымдылық акциясы өтіп жатыр, деп хабарлайды Zhaiyqmedia.kz ақпарат агенттігі.
Акция аясында әскери қызметшілердің балаларына қажетті мектеп керек-жарақтары табысталуда. Сыйлық жиынтықтары отбасыларға жақсы қолдау болып, балалардың жаңа оқу жылына дайындалуына көмектеседі. «Батыс» өңірлік қолбасшылығының қолбасшысы полковник Нариман Акбаров акцияның маңыздылығын атап өтті: «Біз үшін әскери қызметшілеріміздің балалары жаңа оқу жылын жақсы көңіл-күймен және оқуға қажеттінің бәрімен қарсы алуы маңызды. «Мектепке жол» акциясы — бұл әскери қызметшілердің отбасыларына деген қамқорлық пен назардың көрінісі. Балаларға оқуда табыс, жаңа білім және тамаша оқу жылын тілеймін!»
Республикалық «Мектепке жол» акциясы «Батыс» өңірлік қолбасшылығының барлық әскери бөлімдерінде өткізілуде. Атырау, Ақтау, Жаңаөзен және Ақтөбе қалаларында әскери қызметшілердің балаларына мектеп керек-жарақтары табысталып, жаңа оқу жылы қарсаңында қажетті қолдау көрсетілуде. Акция әскери қызметшілердің отбасыларына деген қамқорлықтың және жас ұрпаққа деген көңіл бөлудің тағы бір үлгісі болды. Балаларды қолдау және олардың табысты оқуына жағдай жасау «Батыс» өңірлік қолбасшылығының әлеуметтік және тәрбие жұмысының маңызды бағыттары болып қала береді.
