Сурет: Egemen Qazaqstan
Мексикалық жанкүйерлер Мехикодағы қонақүйде орналасқан Англия құрамасының тыныштығын бұзды. Олар түні бойы отшашу атып, оркестрмен әуен орындады, деп хабарлайды Zhaiyqmedia.kz ақпарат агенттігі.
Англия футболшылары тоқтаған қонақүйдің мекенжайы алдын ала құпия сақталмақ болған. Ұйымдастырушылар жергілікті жанкүйерлер қарсылас командаға тыныш ұйықтауға мүмкіндік бермейтінін білген. Алайда бұл жоспар жүзеге аспады. Құрама матчқа екі күн қалғанда қонақүйге келген кезде, оны ондаған мексикалық жанкүйер күтіп тұрған.
Қонақүйді қаруланған полиция қызметкерлері қоршауға алғандықтан, жанкүйерлер жақын маңдағы көпірге жиналып, сол жерден шулап, қолдау акциясын жалғастырды.
Англия мен Мексика арасындағы кездесу 6 шілде күні Қазақстан уақытымен 05:00-де Мехикодағы әйгілі «Ацтека» стадионында өтеді.
Айта кетейік, Мексика құрамасы бұл стадионда әлем чемпионаттары аясында 1970 жылдан бері бірде-бір матчта жеңілген емес. Сондай-ақ «Ацтека» стадионы теңіз деңгейінен 2200 метр биіктікте орналасқан, бұл қонақ командалар үшін қосымша сынақ саналады.
