Сурет: Egemen Qazaqstan
Бразилия құрамасы 2026 жылғы әлем чемпионатындағы алғашқы ойынында жеңіске жете алмады, деп хабарлайды Zhaiyqmedia.kz ақпарат агенттігі.
С тобындағы Мароккоға қарсы матч 1:1 есебімен аяқталды. Кездесу тартысты өтіп, қауіпті сәттерге толы болды. Есепті алғаш болып марокколықтар ашты. 21-минутта Исмаэль Сайбари қарсылас қақпасына жеке дара шығып, Алиссонды әдемі соққымен алдап, командасын алға шығарды. Бразилиялықтар бірінші таймда-ақ жауап қайтарды. 32-минутта Винисиус Жуниор ойынды өз қолына алып, қапталдан айып алаңына қарай ойысып, дәл соққымен таразы басын теңестірді.
Үзілістен кейін екі құрама да жеңіс голын соғуға ұмтылды. Алайда қақпашылар мен қорғаушылар сенімді ойын көрсетіп, қарсыластарға мүмкіндік бермеді. Қорытынды есеп 1:1. Осылайша, Бразилия мен Марокко турнирді бір ұпайдан бастап отыр. С тобында Гаити мен Шотландия құрамалары да өнер көрсетеді.
Екінші турда Бразилия 20 маусым күні Астана уақытымен сағат 05:30-да Гаитимен кездеседі. Ал Марокко Шотландияға қарсы ойнайды. Бұл матч Астана уақытымен сағат 03:00-де басталады.
