Сурет: FIFA
Әлем чемпионатының С тобындағы үшінші тур матчында Марокко құрамасы Гаитиді 4:2 есебімен жеңіп, плей-оффқа шықты, деп хабарлайды Zhaiyqmedia.kz ақпарат агенттігі.
АҚШ-тағы Mercedes-Benz Stadium стадионында өткен кездесуде марокколықтар жігерлі ойын көрсетті. Африкалық ұжым сапынан Ашраф Хакими, Исмаэль Сайбари, Суфьян Рахими және Жессим Яссин гол соқты.
Гаити құрамасының сапында бұрынғы «Зенит» шабуылшысы Вильсон Изидор гол соқты. Сондай-ақ Марокко қақпашысы Яссин Буну өз қақпасына доп енгізіп алды.
Топтық кезең қорытындысы бойынша Марокко жеті ұпай жинап, С тобында екінші орынмен плей-офф кезеңіне жолдама алды. Дәл осындай ұпай жинаған Бразилия ұлттық құрамасы бірінші орынға ие болды. Шотландия үш ұпаймен үшінші орын алса, ұпайсыз қалған Гаити турнирмен қоштасты.
