Сурет: ашық дереккөз
«Барселонаның» 19 жастағы вингері Ламин Ямаль «Райо Вальеканоға» қарсы матчта дубль жасап, каталондық клуб тарихындағы кезекті рекордын жаңартты, деп хабарлайды Zhaiyqmedia.kz ақпарат агенттігі.
Кездесу сәтсіз басталды: «Райо Вальекано» 12-минутта есеп ашты. Алайда Рафинья мен Ламин Ямальдың голдарының арқасында «Барселона» 21-минутқа қарай есепте алға шықты.
Ямаль үшін 21-минуттағы гол ерекше болды, себебі бұл оның «Барселона» сапындағы 50-ші добы еді. Осылайша, футболшы 19 жасында бес ірі Еуропа лигасының тарихында 50 гол соққан ең жас ойыншы атанды.
«Барселонаның» мәліметінше, Ямаль бұл көрсеткіш бойынша Эрлинг Холанд пен Килиан Мбаппенің рекордтарын жаңартты. Бұған дейін каталондық клуб сапында 50 гол соққан ең жас футболшы атағы Хосеп Эсколаға тиесілі еді, ол бұл межеге 1935 жылы 20 жасында жеткен.
Матч соңына дейін Ямаль тағы бір гол соғып, «Барселона» сапындағы 51-ші добын тіркеді. Нәтижесінде каталондық клуб «Райо Вальеканоны» 5:2 есебімен жеңді.
Испания құрамасының ойыншысы 2024 жылғы Еуропа чемпионатындағы өнерінен кейін әлем футболының басты жас жұлдыздарының біріне айналды. Сол турнирде ол Еуропа чемпионаты тарихындағы ең жас гол авторы атанып, бірнеше рекорд орнатты.
Кейін Ямаль «Барселона» сапында да бірқатар тарихи көрсеткішке қол жеткізді. Ол Ла Лигада гол соққан және негізгі құрамда алаңға шыққан ең жас ойыншы, Чемпиондар лигасында «Барселона» сапында дебют жасаған ең жас футболшы, сондай-ақ «Эль-Класикода» ойнаған ең жас кәсіби футболшы атанды.
Қазіргі таңда Ямальдың еншісінде Испания чемпионатындағы үш чемпиондық титул мен бір ел кубогі, сондай-ақ Испания құрамасымен Еуропа чемпионаты мен әлем чемпионатындағы жеңістер бар.
Футболшы үшін әзірге бағындырылмаған басты белес – Чемпиондар лигасы. Ямаль бұл трофейді 20 жасқа толмай тұрып-ақ жеңіп алуы мүмкін.
Еске салайық, Испания құрамасы футболдан әлем чемпионатының финалында Аргентинаны қосымша уақытта 1:0 есебімен жеңіп, өз тарихында екінші рет әлем чемпионы атанды.
Сондай-ақ бұған дейін Ламин Ямаль «Алтын доп» иегері атануы мүмкін екенін жазған едік.
