Әлемдегі ең танымал әлеуметтік желілердің бірі Instagram соңғы күндері жаппай тазарту жүргізіп жатыр. Нәтижесінде миллиондаған пайдаланушының жазылушылар саны күрт төмендеді, деп хабарлайды Zhaiyqmedia.kz ақпарат агенттігі.
Бұл тазарту әсіресе әлемдік жұлдыздарға қатты соққы берді. Мысалы, футбол жұлдызы Криштиану Роналду бір түнде 3 миллионнан астам оқырманынан айырылды. Ал американдық тележұлдыз Кайли Дженнердің жазылушылар саны 2 миллионға кеміген.
Instagram боттар мен жасанды тіркелгілерге қарсы күресті күшейтті. Компания өкілдерінің айтуынша, бұл — платформаны таза ұстау және нақты аудиторияны қамтамасыз ету үшін қажетті шара.
Қазақстандық қолданушылар да бұл тазартудан тыс қалмады. Көптеген блогерлер мен кәдімгі пайдаланушылардың жазылушылар саны азайған. Мамандардың пікірінше, бұл процесс алдағы апталарда да жалғасуы мүмкін.
Instagram әкімшілігі мұндай тазартуларды мерзімді түрде жүргізіп тұратынын және бұл жолы да ерекшелік жоқ екенін мәлімдеді. Пайдаланушыларға жалған тіркелгілерді сатып алмауға және тек нақты аудиторияға сүйенуге кеңес беріледі.
