Сурет: BILD_Russian
Францияда жаппай наразылық акциялары барысында бүгін түске дейін 135 адам ұсталды, деп хабарлайды Zhaiyqmedia.kz ақпарат агенттігі.
Полиция тінту кезінде пиротехника, металл шарлар және қару ретінде қолданылуы мүмкін басқа да заттарды тәркілеген.
Ішкі істер министрі Лоран Нуньес зорлық-зомбылыққа және дүкендерді тонауға шақырған үндеулердің көбейгенін мәлімдеді. Өткен демалыс күндеріндегі тәртіпсіздіктерден кейін билік қауіпсіздік шараларын күшейтті.
Гренобль қаласында полиция жас демонстранттарға қарсы көзден жас ағызатын газ қолданды. Куәгерлердің айтуынша, акция бейбіт өткен. Алайда құқық қорғау органдарының араласу себебі әзірге белгісіз.
Осындай газ Клермон-Ферран қаласында да қолданылды. Онда наразылық білдірушілер тыйымға қарамастан, орталықтағы Жод алаңына шыққан. Ал Руан қаласында шеру қатысушылары Жанна д’Арк көпіріне қарай жүріп, ұрандар айтқан.
Ең қатаң шектеулер Парижде енгізілді. Жаңа тәртіпсіздіктер болуы мүмкін деген қауіпке байланысты билік 20-дан астам метро станциясын, Лувр музейі мен опера театрын жапты. Елисей алаңында терроризмге қарсы бөлімшелер патрульдік қызмет атқарып жүр.
Франциядағы жаппай наразылықтар өмір сүру құнының өсуіне және білім беру жүйесіндегі мәселелерге байланысты халықтың наразылығы аясында өтіп жатыр.
Еске салайық, 17 қазанда Францияда биліктің әлеуметтік саясатына наразылық білдірген жаппай шерулер өтті. Елдің Ішкі істер министрлігінің мәліметінше, акцияларға шамамен 550 мың адам қатысқан. Ал кәсіподақтар шерушілер санын 800 мыңға жуық деп бағалады.
