Мәжіліс депутаты Талғат Адамбеков «Таза Қазақстан» бастамасын жалпыұлттық қозғалысқа айналдыруды ұсынды. Бұл туралы ол Үкімет басшысы Олжас Бектеновке жолдаған сауалында мәлімдеді, деп хабарлайды Zhaiyqmedia.kz ақпарат агенттігі.
Депутаттың айтуынша, экологиялық акциялардың нәтижелі болуы үшін оны жүйелі түрде ұйымдастыру қажет. Қазіргі кезде «Таза Қазақстан» тек маусымдық іс-шаралармен шектеліп отыр.
«Бізге бұл бастаманы тұрақты әрі жалпыұлттық деңгейге көтеретін қозғалыс құру керек. Ол тек тазалық емес, экологиялық мәдениетті қалыптастыруға да ықпал етеді», – деді Адамбеков.
Сонымен қатар депутат қозғалыс аясында өңірлерде экологиялық патрульдер құруды, қоқыс сұрыптау және қайта өңдеу жүйесін енгізуді ұсынды. Оның пікірінше, мұндай шаралар халықтың экологиялық сауаттылығын арттырып, табиғатқа деген жауапкершілікті күшейтеді.
Үкімет басшысы депутаттың ұсынысын назарға алып, тиісті министрліктерге тапсырма берген. Енді «Таза Қазақстан» жалпыұлттық қозғалысының тұжырымдамасын әзірлеу жоспарлануда.
