Сурет: ашық дереккөз
Балқаштағы кафелердің бірінде келушілер арасындағы жанжал травматикалық қару қолданылған төбелеске ұласты. Салдарынан даяшы қызға оқ тиіп, жарақат алды, деп хабарлайды Zhaiyqmedia.kz ақпарат агенттігі.
Оқиға кешкі уақытта болған. Кафеде отырған бір топ жігіттер арасында жанжал шығып, сөзбен басталған дау ұрысқа ұласқан. Сол кезде біреуі травматикалық тапанша алып, атып жіберген. Оқ кафе даяшысына тиіп, қыз жараланған.
«Қызды ауруханаға жеткізді, жағдайы орташа ауыр. Қазіргі уақытта күдікті ұсталып, тергеу амалдары жүргізілуде», — деді Балқаш қалалық полиция бөлімінің баспасөз қызметі.
Полиция мәліметінше, күдікті уақытша ұстау изоляторына қамалған. Қылмыстық кодекстің бірнеше бабы бойынша тергеу басталды. Кафе әкімшілігі оқиғаға байланысты пікір білдірмеді.
