Сурет: pixabay
Астана қаласы Полиция департаменті Есірткі қылмысына қарсы іс-қимыл басқармасының бөлім бастығы Әлия Қибатқызының айтуынша, «ойын-сауыққа арналған газ» сату фактісі бойынша 30 қылмыстық іс қозғалды, деп хабарлайды Zhaiyqmedia.kz ақпарат агенттігі.
Полицияға соңғы уақытта түнгі клубтарда азот тотығы шарға үрленіп сатылатыны туралы ақпарат түскен. Арнайы рейдтер барысында бұл деректер расталды.
Түнгі клубтарда тұрақты түрде рейдтер жүргіземіз. Жыл басынан бері азот тотығын сату бойынша 30 қылмыстық іс қозғалды. Аталған газ толтырылған жүзден астам баллон тәркіленді, — деді ол.
Бұл газ медицинада наркоз және анестезия үшін қолданылады. Алайда ойын-сауық орталықтарында жастар оны шардан демалып, ішке жұту арқылы психотроптық зат ретінде пайдаланады. Себебі ол лезде көңіл-күйді көтеріп, рахат сыйлап, мастандырады.
Осы бір сәттік алдамшы ләззаттың ауыр салдары жөнінде жастар ойланбайды. Азоттың тотығы денсаулыққа — жүйке, психика және жүрек-қан тамыр жүйесіне өте зиян, — дейді Әлия Қибатқызы.
Бұған дейін Шымкент қаласында «ойын-сауыққа арналған газ» сатумен айналысқан 10 мекеме иесі жауапқа тартылып, 400-ден астам баллон азот тотығы тәркіленгені хабарланған.
