Алматы маңындағы Alatau City аймағында электр қуатымен жұмыс істейтін аэротакси алғаш рет сынақтан өтті. Бұл жаңа көлік түрі қала кептелісін азайтып, туристер мен тұрғындардың қажетті нысандарға жетуін едәуір жеделдетеді, деп хабарлайды Zhaiyqmedia.kz ақпарат агенттігі.
Сынақ барысында аэротакси белгіленген бағыт бойынша ұшып, қону мен көтерілу кезінде тұрақтылық танытты. Құрылғы толығымен экологиялық таза, шусыз және зиянды шығарындысыз жұмыс істейді.
«Біз бұл технологияны Алматы агломерациясының көлік жүйесіне енгізуді жоспарлап отырмыз. Аэротакси уақытты үнемдеп, қала экологиясын жақсартады», — деді жоба жетекшісі Ерлан Серікқалиев.
Жаңа көлік түрінің алғашқы рейстері келесі жылы басталуы мүмкін. Қазіргі уақытта қауіпсіздік стандарттары мен ұшу рұқсаттарын реттеу жұмыстары жүргізілуде.
