Қазақстанда ерекше күтімді қажет ететін балаларға арналған оңалту орталықтарының саны өсіп келеді. Қазіргі уақытта елімізде мұндай 81 мекеме жұмыс істейді, деп хабарлайды Zhaiyqmedia.kz ақпарат агенттігі.
Бұл орталықтарда балаларға кешенді медициналық және психологиялық көмек көрсетіледі. Мемлекет тарапынан бұл бағытқа ерекше көңіл бөлініп, жаңа орталықтар ашу жоспарлануда.
Мамандардың айтуынша, мұндай мекемелердің көбеюі мүмкіндігі шектеулі балалардың өмір сүру сапасын жақсартуға септігін тигізеді. Әсіресе шалғай өңірлердегі отбасылар үшін бұл үлкен көмек.
«Біздің басты мақсатымыз – әрбір баланың сапалы оңалту қызметіне қол жеткізуі. Осы орайда өңірлердегі орталықтардың жұмысын жандандырып, материалдық-техникалық базасын нығайту жұмыстары жалғасады», — деді Денсаулық сақтау министрлігінің өкілі.
БҚО-да да бірнеше оңалту орталығы жұмыс істейді. Орал қаласындағы «Камкорлық» орталығы ерекше балаларды қабылдап, олардың денсаулығын қалпына келтіруге көмектеседі. Алдағы уақытта өңірде тағы бірнеше заманауи орталық ашу жоспарда бар.
