12 мамырда Қазақстанның бірнеше өңірінде ауа райы күрт өзгереді. Батыста шаңды дауыл соғып, солтүстікте тіпті үсік жүруі мүмкін, деп хабарлайды Zhaiyqmedia.kz ақпарат агенттігі.
«Қазгидромет» мамандарының болжамынша, елдің батыс аймақтарында жел күшейіп, шаңды дауыл көтеріледі. Желдің жылдамдығы секундына 15-20 метрге жетеді деп күтілуде.
Ал солтүстік өңірлерде түнде ауа температурасы 0-5 градусқа дейін төмендеп, жер бетінде үсік пайда болуы ықтимал. Бұл егістік алқаптар мен бақша өнімдеріне зиян келтіруі мүмкін.
Оңтүстік және орталық аймақтарда ауа райы салыстырмалы түрде тұрақты болады. Дегенмен, күндіз желдің күшеюі байқалады.
«Қазгидромет» мамандары халықты сақ болуға шақырады. Әсіресе, жол жүрісі кезінде абай болу керек. Шаңды дауыл кезінде көру қабілеті нашарлайды, сондықтан жылдамдықты азайтып, қашықтықты сақтау қажет.
