Туризм және спорт министрі Ербол Мырзабосынов Қарағанды облыстық спорт басқармасының басшысы Серік Сәпиев пен оның орынбасары арасындағы жанжалға қатысты пікір білдіріп, бұл жағдайды «спортшымен болған оқиға» деп ерекшелемеуге шақырды, деп хабарлайды Zhaiyqmedia ақпарат агенттігі.
Естеріңізге сала кетейік, 21 қаңтарда Қарағандыда Серік Сәпиев пен оның орынбасары Дәурен Есімханов арасында кикілжің болған. Олимпиада чемпионы мұны «кадр саясатына заңсыз араласу әрекетінен» туындағанын мәлімдеген еді.
Үкіметте өткен брифингте министр бұл оқиғаға қатысты өз ойын айтты.
«Менің ойымша, бұл оқиға нақты спортшымен болды деп ерекше назар аударудың қажеті жоқ. Яғни, бұл жағдай әкімдіктің ішінде болды. Қазір Мемлекеттік қызмет істері агенттігі тексеріс жүргізіп жатыр, оның қорытындысы бойынша бізге хабарлайды», – деді Ербол Мырзабосынов.
Министрдің сөзінше, тексеріс нәтижелері шыққаннан кейін ғана нақты шешім қабылданады.
Фото: Әлеуметтік желіден
