Батыс Қазақстан облысында ерекше қажеттілігі бар 2 мыңнан астам азамат референдумда өз таңдауын жасады, оларға сайлау учаскелеріне жету үшін тегін такси қызметі мен арнайы жағдайлар ұйымдастырылды, деп хабарлайды Zhaiyqmedia ақпарат агенттігі.
Облыс бойынша референдумға қатысуға құқылы 446 391 адамның 2254-і – ерекше жағдайды қажет ететін, мүмкіндігі шектеулі жандар. Облыстық референдум комиссиясы бұл санаттағы азаматтардың өз таңдауын еркін білдіруіне барынша жағдай жасағанын хабарлады. Орал қаласы мен аудандарда инватакси қызметі іске қосылып, учаскелерде арнайы бұрыштар ашылған.
Тағдыр сынағына мойымай, арбаға таңылса да қоғамдық өмірге белсене араласып жүрген жандардың бірі – Гүлмира Батпақұлова. Ол өзі құрған «Арба» бірлестігі арқылы талай жанға қолдау көрсетіп келеді. Белсенді бүгінгі маңызды саяси науқаннан да тыс қалмай, өз дауысын беруге келді.
«Бүгін №34 учаскеде өз дауысымды беруге келдім. Мұнда мүмкіндігі шектеулі жандардың бәріне, соның ішінде нашар көретіндерге де өте ыңғайлы жағдай жасалған. Тактильді плитка, бағыттаушы, арбамен кіруге арналған пандус – бәрі бар. Тірек-қимыл аппараты бұзылған адамдарға да барлық жағдай қарастырылған. Ел ертеңіне қатысты ұстанымымды білдіру – менің азаматтық парызым», – дейді Гүлмира Батпақұлова.
Жалпы, облыс бойынша ерекше қажеттілігі бар жандарды сайлау учаскелеріне тасымалдау үшін 78 арнайы автокөлік жұмылдырылған.
Фото: Әлеуметтік желіден
