Биыл жазда еліміздің бірнеше өңірінде құрғақшылық болуы ықтимал. Бұл туралы Үкімет отырысында Экология министрлігінің өкілдері мәлімдеді, деп хабарлайды Zhaiyqmedia.kz ақпарат агенттігі.
Мамандардың болжамынша, құрғақшылық ең алдымен Батыс Қазақстан, Атырау, Маңғыстау және Қызылорда облыстарына қауіп төндіреді. Бұл аймақтарда жауын-шашын мөлшері нормадан төмен болуы мүмкін.
«Қазгидрометтің дерегінше, жазғы маусымда еліміздің оңтүстік-батыс бөлігінде ауа температурасы жоғарылап, ылғал тапшылығы байқалады. Сондықтан су ресурстарын үнемдеу және суару жүйелерін тиімді пайдалану қажет», — деді министрлік өкілі.
Министрлік аймақтардағы әкімдіктерге дайындық шараларын күшейтуді тапсырды. Атап айтқанда, су қоймаларын толтыру, су үнемдеу технологияларын енгізу және диқандарға кеңес беру жұмыстары жүргізіледі.
Егер құрғақшылық болжамы расталса, егін шығымына кері әсер етуі мүмкін. Сондықтан мамандар суды үнемдеуге және ыстыққа төзімді дақылдарды отырғызуға кеңес береді.
