Мазмұнға өту
Сурет: Egemen Qazaqstan
Мемлекет басшысының Шанхайға жасаған сапары кезінде жалпы құны 15 миллиард АҚШ долларынан асатын 70-тен астам келісімге қол қойылды. Бұл Қазақстанның технологиялық әріптестікті дамытудағы жоғары қарқынын көрсетеді, деп хабарлайды Zhaiyqmedia.kz ақпарат агенттігі.
Президент Қасым-Жомарт Тоқаевтың төрағалығымен Премьер-Министрінің орынбасары – Жасанды интеллект және цифрлық даму министрі Жаслан Мәдиев Қытайдың технологиялық секторындағы жетекші компаниялар өкілдерімен кездесулер өткізді. Дөңгелек үстел форматында өткен кездесуде Мәдиев Қазақстанның цифрлық трансформациясының басым бағыттары мен технологиялық ынтымақтастықтың негізгі векторларын таныстырды. Ол республика жасанды интеллектті болашақ экономикалық өсудің іргелі факторы ретінде қарастыратынын және халықаралық инвесторларды тарту үшін заманауи цифрлық инфрақұрылым қалыптастырып жатқанын атап өтті.
Қытайдың ірі жоғары технологиялық компанияларының басшыларымен өткен дөңгелек үстел барысында Қазақстанның Еуразиядағы жасанды интеллектті дамыту орталықтарының бірі ретіндегі рөлін нығайтуға бағытталған құжаттармен ресми алмасу рәсімі өтті. Президент Қасым-Жомарт Тоқаев Қытай Халық Республикасының Төрағасы Си Цзиньпинмен келіссөз жүргізді.
Жаслан Мәдиевтің Heilongjiang Huida Technology Co., Ltd. компаниясының негізін қалаушы Чжан Юймен жүргізген келіссөздерінің қорытындысы бойынша Қазақстан Республикасы Жасанды интеллект және цифрлық даму министрлігі, Freedom Holding Corp. және Huida Tech арасында стратегиялық ынтымақтастық туралы меморандумға қол қойылды.
BYD компаниясымен өзара іс-қимыл ынтымақтастықтың маңызды бағытына айналды. Тараптар инновациялық технологияларды енгізу бойынша әріптестікті дамытуға бағытталған меморандумға қол қойды. Оның аясында қазақ тілін қолдайтын AI-ассистентті компанияның өзінің үлкен тілдік моделі (LLM) негізінде әзірлеу, сондай-ақ күштік электроника мен жартылай өткізгіштер саласындағы бірлескен әзірлемелерді жүзеге асыру көзделген.
Astana Hub халықаралық технопаркі, Alibaba Cloud және Khan Tengri Innovation Hub арасындағы өзара түсіністік туралы меморандум стартап-экожүйелерді терең ықпалдастыруға, оларды ауқымдауды қолдауға, бұлттық кредиттер бөлуге, QWEN AI моделін Astana Hub платформасына интеграциялауға, сондай-ақ Alibaba Cloud компаниясының Астанада қатысу мүмкіндігін және Alem AI аясында AI Factory дамыту мәселелерін пысықтауға бағытталған.
Цифрлық инфрақұрылымды энергетикалық қамтамасыз ету бағытында Қазақстан Республикасы Жасанды интеллект және цифрлық даму министрлігі мен China Energy Overseas Investment Co., Ltd. арасында Маңғыстау облысында қуаты 200 МВт болатын жаңартылатын энергетика жобасын әзірлеу жөніндегі ынтымақтастық туралы өзара түсіністік меморандумына қол қойылды. Жоба аясында қытай тарапы инвестиция салуды, құрылысты және пайдалануға беруді өз мойнына алады.
Ғылыми және білім беру әлеуетін нығайту мақсатында Қазақстан Республикасы Жасанды интеллект және цифрлық даму министрлігі, Astana IT University және UBTECH Robotics Ltd. арасында өзара түсіністік туралы меморандум жасалды. Құжат робототехника саласын кешенді мемлекеттік қолдау жүйесін қалыптастыруға және AlemGPT жүйесімен үйлесімді зияткерлік роботтардың көптілді экожүйесін дамытуға бағытталған.
Қасым-Жомарт Тоқаев Қытайдың жетекші компаниялары басшыларымен кездесті. Бұдан бөлек, Қазақстан Республикасы Жасанды интеллект және цифрлық даму министрлігі ақпараттық қауіпсіздік саласындағы әріптестікті нығайту мақсатында QAX компаниясымен ынтымақтастық туралы меморандумға қол қойды.
Бүгінде Қазақстан жасанды интеллект мемлекеттік басқарудың, экономиканың, білім беру мен өнеркәсіптің технологиялық негізіне айналатын AI-native nation қағидаты бойынша жүйелі түрде дамып келеді. Республиканың WAIC 2026 конференциясына қатысуы және жасанды интеллектті басқару жөніндегі жаһандық бастамаларды қолдауы Қазақстанның көпвекторлы саясатқа бейілділігін және пікірталастардан нақты жобаларды іске асыру кезеңіне – бірлескен зерттеулерге, есептеу ресурстарымен алмасуға және жасанды интеллектті экономиканың нақты секторына енгізуге дайын екенін көрсетеді. Бұл қадамдар Қазақстанның технологияларды тұтынатын нарық қана емес, оларды әзірлейтін, сынақтан өткізетін және кең ауқымда енгізетін өңірлік орталыққа айналуға ұмтылысын айқындап, жаңа жаһандық технологиялық кеңістікте лайықты орын алуға бағытталғанын растайды.
