Парламент палаталарының бірлескен отырысында Әділет министрі Ерлан Сәрсембаев «Қазақстан Халық Кеңесі» туралы Конституциялық заң жобасын таныстырды. Бұл құрылым қоғамдық келісімді нығайтуға бағытталған жаңа институт ретінде ұсынылып отыр, деп хабарлайды Zhaiyqmedia.kz ақпарат агенттігі.
Министрдің айтуынша, Халық Кеңесі этносаралық және конфессияаралық қатынастарды үйлестіруге, қоғамдық пікірді ескеруге және маңызды шешімдер қабылдауда азаматтардың қатысуын қамтамасыз етуге тиіс.
«Кеңес құрамына мемлекеттік органдардың, үкіметтік емес ұйымдардың, діни бірлестіктердің өкілдері кіреді. Бұл – азаматтық қоғам мен мемлекет арасындағы диалогтың жаңа алаңы», – деді Ерлан Сәрсембаев.
Заң жобасында Кеңестің консультативтік-кеңесші орган ретінде жұмыс істейтіні, оның шешімдері ұсынымдық сипатта болатыны көрсетілген. Дегенмен, сарапшылар бұл институттың нақты ықпалы оның құрамы мен өкілеттіктеріне байланысты екенін айтады.
Құжат қоғамдық талқылаудан өтіп, кейін Парламент қарауына ұсынылады. Егер қабылданса, Халық Кеңесі еліміздегі әлеуметтік-саяси тұрақтылықты сақтаудың маңызды құралына айналуы мүмкін.
