Сурет: Egemen Qazaqstan
Қазақстан Ауғанстанға жалпы салмағы 318,8 тонна гуманитарлық жүк пен дәрігерлер тобын жіберді, деп хабарлайды Zhaiyqmedia.kz ақпарат агенттігі.
Премьер-Министрдің баспасөз қызметінің мәліметінше, гуманитарлық жүктің құрамына 1,867 тонна дәрі-дәрмек пен медициналық бұйымдар, 300 тонна қант, 100 жазғы шатыр, төсек-орын жабдықтары және басқа да қажетті заттар кірген.
Қазақстандық делегацияны Премьер-Министрдің орынбасары – Ұлттық экономика министрі Серік Жұманғарин бастап барды. Делегация құрамында жетекші медициналық ұйымдардың тоғыз маманы бар. Олар Ауғанстанда Қазақстан медицинасы күндері аясында бір апта бойы кеңес беріп, практикалық көмек көрсетеді және шеберлік сабақтарын өткізеді.
Гуманитарлық жүктің негізгі бөлігі сегіз вагонмен теміржол арқылы Балх провинциясындағы Хайратон станциясына жеткізілді. Дәрі-дәрмектің бір бөлігі делегациямен бірге әуе көлігімен тасымалданды.
Көмекті жеткізуді KazAID агенттігі Сыртқы істер, Төтенше жағдайлар, Денсаулық сақтау және Көлік министрліктерімен бірлесіп ұйымдастырды.
Үкімет 17 маусымда Қазақстан Президенті Орталық Азия елдері мен Ауғанстанға арналған БҰҰ-ның Тұрақты даму мақсаттары жөніндегі өңірлік орталығын Алматыда құру туралы заңға қол қойғанын еске салды.
