Президент Қасым-Жомарт Тоқаев орта білім жүйесіне жасанды интеллектіні енгізу туралы жарлыққа қол қойды, деп хабарлайды Zhaiyqmedia.kz ақпарат агенттігі.
Жарлық бойынша 2026 жылдың 1 тамызына дейін пилоттық жоба аясында мектептер техникалық тұрғыдан жарақтандырылады. Атап айтқанда, тұрақты және жылдамдығы жоғары интернетпен қамтамасыз ету, заманауи компьютерлік техника орнату жоспарланған.
Бұл шаралар жасанды интеллект негізіндегі оқыту жүйесін енгізуге мүмкіндік береді. Жоба алдымен бірнеше өңірде сынақтан өтеді, содан кейін бүкіл елге таратылады деп күтілуде.
Мемлекет басшысы білім саласын цифрландыруды басым бағыттардың бірі деп атады. Оның айтуынша, жасанды интеллект оқушылардың білім сапасын арттырып, мұғалімдердің жүктемесін азайтады.
Әзірге жобаға қанша қаражат бөлінетіні және қандай мектептер қамтылатыны туралы нақты ақпарат жоқ. Бірақ мамандар бұл бастаманы отандық білім беру жүйесіндегі төңкеріс деп бағалап отыр.
